Fable 1 de la XIIIème et dernière nuit des "Facétieuses Nuits"
par Giovanni Francesco Straparola

Un loup un regnard et un asne se confessent l'un l'autre les deux premiers
s'entrepardonnent puis d'un commun accord dévorent le pauvre asne soubs couleur d'une légère faulte qu'il dict avoir faict.

Au temps passé que les bestes parloient le loup le regnard et l'asne deliberèrent un jour aller à Rome gaigner les pardons. Advint que comme ils cheminoient de compagnie devisans de plusieurs choses le loup à qui les pieds commençoient à faire mal dict aux autres. Mais mes frères à quoy nous travaillons nous ainsi en l'accomplissement d'un tant long et fascheux voyage veu que ne sommes asseurez y trouver ce que nous y allons chercher. Et quoy pensez vous point par vostre foy que le pape ne soit assez empesché ailleurs et n'ayt autres affaires à desmesler qu'à escouter parler des pauvres bestes telles que nous sommes ? Certes je croy bien que ouy c'est pourquoy je serois d'advis si le trouvez bon que sans davantage nous tuer le cœur et le corps et nous hazarder aux dangereux inconveniens qui journellement adviennent aux voyageurs nous de meurassions icy et sans passer plus oultre nous confessassions l'un l'autre et que chacun de nous selon la gravité de ses pechez receust la penitence et absolution par son compagnon. Ce que les autres accordèrent. Au moyen de quoy ce maistre loup commença et se jettant à genoux aux pieds du regnard en s'accusant dict ainsi. Je vy ces jours passez une truye qui avoit douze petits cochons laquelle grasse refaite et en bon point s'alloit tous les jours pour mener aux champs et prendre du bon temps sans se soucier de ses petits que elle laissoit mourir de faim en la maison. A raison de quoy et ne pouvant souffrir une telle impiété et mauvais naturel de mère je la devoray. Après me souvenant que ces petits cochonnetz n'avoient plus qui leur baillast à tetter meu à compassion je les mangeay tous les uns après les autres affin de les oster de ceste misère. J'ay commis ces choses mais à bonne intention toutesfois où j'auray offensé j'en demande pardon et absolution. Et disoit ceste bonne beste tout cecy en pleurant faisant la meilleure mine du monde. Adonc le regnard luy dict Frère ton peché n'est pas grand pource que tu as eu commise ration des pupiles pour ta penitence je t'ordonne et t'enjoincts que tu n'assailles jamais que par le derrière tous animaux cornuz si tu ne veux estre blessé de la corne. Cela faict et le loup s'estant levé le regnard se prosterna devant luy disant : Un bon villageois avoit un coq si meschant et querelleux qu'il battoit tous ceux de ses voisins et se voyant victorieux chantoit si haut et souvent qu'il estourdissoit tout le monde et ne molestoit seulement ceux qui estoient malades mais jour et nuict rompoit la teste aux plus sains à raison de quoy ne pouvant plus supporter son audacieuse gloire un jour comme il se pourmenoit avec ses femmes je luy mis la main sur le col et l'estranglay à belles dents et le devoray. Depuis ses femmes faschées de se veoir vefves et par moy privées de leurs amours m'en ont tellement voulu qu'elles n'ont jamais cessé me poursuivre à belles injures tant que n'en pouvant plus je fu contrainct leur monstrer que cela me desplaisoit de mode qu'en ayant attrappé la plus grande partie je les ay mangées. J'ay peché je le confesse je m'en repen et vous en demande l'absolution. A quoy le loup : Tu as bien faict d'avoir ainsi chastié et l'orgueil du coq et l'injurieuse insolence des poules et encores qu'en cela tu n'ayes beaucoup offensé si ne me veux je monstrer envers toy tant indulgent comme tu m'as esté ainsi t'enjoincts pour ta penitence que par trois vendredis consecutifs si tu n'as de la chair tu t'astienne d'en manger. Va en paix. Puis se retournant vers l'asne luy dict. Et toy frère qu'attens-tu que ne viens à confesse? Qu'as-tu faict ? Respond le pauvre asne : Que voulez vous que je vous confesse. Vous sçavez les longs travaux et grands tourmens que sans cesse et continuellement à toute heure je suis contrainct endurer portant incessamment bleds farines boys fumier bref tout ce que l'on peult dire avec un nombre infiny de lourds pesans et meurtriers coups de baston. Toutes fois puisque il faut confesser verité je pense avoir offensé en une seule chose c'est qu en me jouant dernierement je fis sortir trois ou quatre brins de paille des souliers au serviteur qui m'a voit en sa charge lesquels je mangé et croy qu'à cette occasion il a enduré quelque froid aux pieds j'ay failly en cela je le confesse je m'en repent vous suppliant humblement avoir pitié et misericorde de moy et m'ordonner penitence digne de mon forfaict. O larron dirent les autres qu'as tu faict ? Malheur sur toy à jamais tu es damné car par ta confession mesme tu es seul cause que ce pauvre serviteur a enduré beaucoup de mal et de froidures aux pieds dont peut estre il est mort qui faict que ton ame estant damnée ton corps ne peut estre sauvé. Ce disant se ruèrent impétueusement sur luy et le prenant à belles dents le devorèrent. Ceste fable recitée par le seigneur ambassadeur pleut à tous qui ne l'estimèrent fable mais une pure vérité cachée soubs ce masque allegoric car par le loup et le regnard s'entendent les grands qui se pardonnans l'un l'autre tourmentent l'asne qui est le pauvre peuple lequel porte le fais de leurs meschancetez.